تجربة تسوق من موقع فانيلا
اليوم بتكلم عن متجر فانيلا " أتوقع كثير منكم سمع عنه " .
أكثر شيء لفتني تصميمهم للموقع و اهتمامهم بالتفاصيل الصغيرة ،
الموقع لحاله يجذبك تشترين ، الأسعار متفاوته و أغلبها معقولة و تناسب الكل .
المنتجات عندهم متنوعة مابين مكياج و ملابس .. أحذية و شنط و اكسسورات و منتجات من صنع السعودية جداً جميلة .
من ضمن خدماتهم المقدمة للعملاء اقتراح منتج ، لو كنتِ حابه منتج مو متوفر عندهم اقترحيه عليهم و راح يوفره في اقرب فرصة.
من مزايا فانيلا إنهم يعطوا أكواد تخفيض في المناسبات و لما تسجلي في الموقع أول مره تحصلي على شحن مجاني ، من غير العروض الجميلة اللي توصلك على الايميل .
و يدعم خدمة الدفع عند الأستلام .
اعذروني ماصورت الطلب أول ما وصل :|
تغليفهم و ترتيبهم للشحنة أنيق و جميل " يحسسني بحرصهم و اهتمامهم "
الأكسسورات تجي في علب صغيرة عليها شعار فانيلاً ، باليت المكياج مغلفينه بتغليف فقاعي حتى يحافظ عليه من الكسر أو التلف .
بصراحة حسيت بإهتمامهم و حرصهم في ترتيب طلبي مررره شكراً و ربي يوفقكم فانيلاً ، متجركم حاز على إعجابي و كانت تجربة تسوق جميلة .
طلبت منهم :
- كونتور انستازيا بيفرلي هيلز ( الدرجة : Light to Medium ) .
جربت الباليت كم مره و عجبني بصراحة ، و أشوف إنه راح يخدمني كثير في الفترة الجاية .
طبعاً راح أتكلم عنه في تدوينة مفصلة بعد ما أجربه بشكل جيد .
- فرشاة اكسبيرت ريل تكنيك .
بعد ما جربتها سألت نفسي ليش ما فكرت أخذها من قبل ؟؟!!
الفرشة كثيفة و توزع الفاونديشن بشكل جيد بالإضافة إلى شكلها العملي اللي يساعدك تستخدميها للكونتور .
راقت لي جداً ، و أكيد بكتب عنها تدوينة مفصلة بعد التجربة الجيدة .
الفاتورة مرتبة ، مدون فيها تفاصيل الطلب و بيانات العميل .
طويت الفاتورة حتى أخفى بياناتي p:
الطلب و صلني خلال أسبوع .
خلونا نبدأ مع طريقة الطلب من فانيلاً :
عنوان الموقع :
الموقع عربي 100% و سهل في الإستخدام و تقريباً كل شيء واضح
في البداية سوي حساب لك في المتجر ، و عادي لو تسوقتي و أخترتي المنتجات تقدري تسوي حساب من ضمن خطوات اعتماد الطلب ، لكن أفضل من البداية تسوي حساب .
1- بعد الضغط على خيار إنشاء حساب بتفتح لك صفحة تكتبي فيها البيانات المطلوبة .
2- هذه هي البيانات الأساسية اللي تطلب منك في البداية " هنا عادي لو حطيتي رقم جوالك مو ضروري تحطي رقم جوال المستلم " .
3- اضغطي متابعة لإنشاء الحساب ، و بكذا مبروك صار عندك حساب في فانيلاً .
و راح توصلك رسالة على الإيميل تشكرك على التسجيل .
لما تتسوقي في الموقع و تختاري السعلة اللي حابه تشتريها أضغطي عليها .
هنا مثال
في صفحة المنتج بتلقي وصفه و الدرجات المتوفرة و سعره و صور إضافية له .
1- حالة التوفر .
2- العدد ، فيك تزيدي أو تنقصي على حسب طلبك .
3- الإضافة للسلة بمجرد ضغطك عليها فأنتِ أضفتي هذا المنتج لسلة مشترياتك .
بالنسبة للملابس و السلع اللي تعتمد على المقاسات انتبهوا و أنتو تختاروا المقاس و شوفوا دليل المقاسات قبل الأختيار .
بعد الإضافة بتظهر لك نافذة بإنه تمت الإضافة و تختاري مابين :
متابعة التسوق : لو في حاجات كمان تبغى تشتريها ، أو إنهاء الطلب لو كان هذا هو طلبك فقط .
تسوقتي و خلصتي و تبغي تروحي لـسلة التسوق .
في يسار المتجر موجود تبويب لسلة الشراء لو ضغطتي عليها مباشرة حتروحي لصفحة السلة .
و اذا ضغطتي على السهم راح يطلع لك قائمة منسدلة فيها المنتجات اللي اخترتيها و خيارين .
معاينة السلة : لو حبيتي تحذفي سلعه ما عاد تبغى تشتريها أو عندك كود تخفيض حبيتي تكتبيه .
اعتماد الطلب : منها خلاص يصير إنه أعتمدتي طلبك و مايبقى لك غير خطوات قليلة لإنهاء التسوق و انتظار و صول الطلب .
هنا صفحة سلة الشراء .
1- مكان كود التخفيض ، لو عندك تكتبيه هنا و تضغطي اعتمد التخفيض و يضاف للفاتورة .
و نفس الطريقة قسيمة الهدايا .
2- في حال خلصتي و تبغى تبدأي بإنهاء الطلب و اعتماده ، اضغطي على إعتماد الطلب .
بعد الضغط على اعتماد الطلب تكملي بياناتك .. عنوان الشحن و طريقة الشحن و تأكيد الطلب .
الخطوات سهلة و سلسلة و واضحة .
بعد اعتماد الطلب بيوصلك على الإيميل بيانات الطلب .
اضغطي على الرابط .
بيوصلك الرابط لصفحة سجل الطلب .
شفتوا الرابط اللي عنده نجمه ادخلوا عليه لتأكيد الطلب .
1- من خلال حسابك تدخلي على طلباتك و تشوفي التغيير في حالة الطلب .
قيد المراجعة .. تم إرسال الطلب للمستودع ..
"تمت المعالجة "هذه يعني خلاص الطلب في الطريق و بتوصلك رسالة على الإيميل برقم التتبع و رابط لصفحة متابعة الشحنة .
و هذه هي الرسالة اللي توصل للإيميل .
و بس تدخلي الرابط و تتابعي فيه شحنتك برقم التتبع اللي أعطوه لك .
و راح توصلك رسالة من ناقل على الجوال تطلب منك تأكيد موقع الأستلام .
الرابط مافتح معي على الجوال ، فتحته من اللابتوب و حددت الموقع و الوقت .
لما توصل شحنتك راح يتواصل معك المندوب لتسلميها .
ماشاء الله ناقل كانوا سريعين في توصيل الشحنة و وصلت سليمة و هذه الحاجة الحلوة فيهم ، لكن طلبت استلمها مابين الساعه 5 عصرا و 8 مساء .
جابوها لي 1:30 الظهر ، اوك كويس انكم سريعين و حاجة حلوة لكن أتمنى تلتزموا بالوقت اللي يختاره العميل ، كون العميل ما اختار هذا الوقت الا لانه يناسبه و شكراً لكم .
ليست هناك تعليقات:
إرسال تعليق